Репертоар

Сценографија: Мартин Манев
Kостимографија: Антонија Гугинска Јорданоска и Гордана Божиновска
Дизајнери на светло: Филип Петковски и Мартин Манев
Дизајн и аранжман на музиката: Давид Николовски
Камерман и фотограф: Марко Марјановиќ
Инспициент: Жарко Намичев
Суфлер: Милка Анчевска

„Ифигенија за ништо“ е современа адаптација на античката трагедија на Еврипид, која се фокусира на личните и на семејните конфликти што произлегуваат од жртвувањето во име на „високите цели“. Базирана на „Ифигенија во Авлида“ и митот за убиството на светиот елен на божицата Артемида, оваа постановка користи елементи од физичкиот и танцовиот театар, создавајќи современ перформативен вокабулар што ги рефлектира стравовите, насилствата и апсурдите на денешното време. Додека трагедијата на Еврипид ја истражува немоќта на човекот пред волјата на боговите, оваа адаптација става акцент на симболиката на смртта на Ифигенија како последица не само на воените амбиции на нејзиниот татко туку и на пошироките механизми на политичка корупција и националистички идеологии. Нејзината смрт не е возвишена ниту херојска — таа е производ на семејна манипулација и инструментализирана патриотска реторика. Убиена без љубов и емпатија, нејзиното страдање станува симбол на начините на кои системите на моќ ги користат човечките животи за лична и колективна добивка. Ифигенија во оваа верзија не ја разбира смислата на својата жртва — таа не умира за нешто, туку за ништо, па така станува дел од еден поголем општествен механизам кој ја проголтува поединечната волја и ја заменува со идеолошка дисциплина. Затоа, „Ифигенија за ништо“ не е само одек од минатото туку и огледало на сегашноста, во која истите тие механизми продолжуваат да ги потиснуваат човековите права и слободи. Трагајќи по баланс меѓу телесното и јазичното, претставата повикува на критичка анализа на општествата што ги оправдуваат овие процеси.